La última corrida (Ang Huling Korida) - Spanish-Filipino Version

La última corrida (Ang Huling Korida) 
Spanish-Filipino version

Tao laban sa hayop. Mga babaeng nagsasayaw na may kastanyetas. Isang mapanganib na pag-indayog na bibighani at magbibigay-takot sa buong liwasan. Dumating sina Celipe at Relojerín sa Iloilo upang patumbahin ang mga toro gamit ang kanilang espada, ngunit ngayon ay may masidhi na ring hangarin na bihagin ang mga puso nina Manolita at Lilia.

Yayanigin ng dalawang torerong mula sa Maynila ang buong liwasan, at matatagpuan nila ang kanilang mga sarili sa isang pambihirang kalagayan, sa pagitan ng pagkahumaling, pag-ibig, at panibugho. Kung ang kanilang kapalaran ay wala na sa kanilang kamay, bagkus ay nakasalalay sa malamig na simoy ng dagat, pitik ng kastanyetas, at talas ng sungay ng dambuhalang toro, pag-ibig ba ang sa kanila ay magliligtas o siyang maghahatid ng kamatayan?

Kinulayan at muling binigyang-buhay mula sa personal na koleksyon ng premyadong manunulat na si Guillermo Gómez Rivera, guhit ni Ramón Fernández Pasión, inihahandog ng Vibal Foundation, Inc. ang isang kuwentong mula sa tila limot nang pahina ng kasaysayan—ang panahong ang pakikipaglaban sa isang toro ay kasing mapanganib ng poot ng isang babae.
 

"Madalas ay hindi makaugnay ang mga kabataan satuwing pinag-uusapan ang mga kultural na pamanang kolonyalismong Espanyol, dahil nakatali lámang ang kanilang kaalaman sa Kristiyanismo at sa pang-aapi. Sa akdang ito, dadalhin sila ng mga salita at imahensa isang kawili-wiling paglalakbay, at hahangaan nila at pahahalagahan ang isang bahagi ng kasaysayan nanakamamanghang matuklasan: ang mga sayaw mula sa Andalusia at ang labanan ng mga matador at toro na lalong nagpapatingkad sa nakaraan ng mga Filipino."

-Prof. Michael Charleston “Xiao” Chua
Public Historian

Tungkol sa Manunulat

Si Guillermo Gómez Rivera ay ipinanganak sa Dingle, Iloilo, sa timog-silangang bahagi ng Panay. Siya ay isang manunulat sa wikang Filipino at Espanyol. Siya rin ay isang historyador, guro, at iskolar ng wika na mayroong adbokasiyang protektahan ang kulturang Espanyol bilang ito ay isang mahalagang elemento sa pagkakakilanlan ng mga Pilipino. Tumatak si Guillermo bilang isang matagumpay na manunulat na nagpakita ng pagtatagpo ng panitikan, musika, at sayaw. Siya ay tinatanaw bilang isa sa mga pinakakilalang manunulat sa kasalukuyang panahon ng mga Pilipinong nagsusulat sa wikang Espanyol.

Nagtamo siya ng PhD sa Filipino Spanish literature, at nagtapos ng mga programang Spanish, economics, history, at management. Si Guillermo ay nagsilbi ring academic correspondent ng Royal Spanish Language Academy bilang pinakabatikang miyembro ng Academia Filipina de la Real Academia Española de la Lengua. Buhat sa malawak niyang pag-aaral sa mga wika ng Pilipinas, siya ay naging kalihim ng National Language Committee of the Philippine Constitutional Convention (1971–1973) na pinasinayahan ang pagbuo ng bagong konstitusyon.

Noong 1975, siya ay nakatanggap ng Premio Zóbel, ang pinakamataas na parangal sa panitikan sa Pilipinas na iginagawad sa mga pinakamahusay na akda sa wikang Espanyol, para sa kaniyang dulang El caseron. Bukod sa pagiging isang manunulat, siya rin ay isang makata, mananaysay,
kartunista, at recording artist. 

Ang mga pananaliksik ni Guillermo sa mga awitin at sayaw ng Pilipinas, lalong higit sa mga may impluwensiya ng Kastila, ang nagsilbing batayan sa paglikha ng mga sayaw na itinanghal ng Bayanihan Philippine National Folk Dance Company na kilala sa buong mundo. Samantala, noong 1960s, nakapaglabas si Guillermo ng mga pambihirang komposisyong Pilipino na nasa wikang Espanyol na kamakailan lang ay pumukaw ng pansin sa Instituto Cervantes sa Maynila upang ito ay mai-remaster at muling ilabas. Bilang kinikilalang isang batikang mananayaw ng flamenco, siya ay nagturo ng sining na ito sa Pilipinas at ipinasa ang kaniyang kaalaman sa maraming mag-aaral na Pilipino. Sa kaniyang patuloy na pagsusulat hinggil sa kulturang Asiano, Pilipino, at kasaysayan ng Espanya, iginawad sa kaniya ang Premio Casia Asia 2023 sa kategoryang Culture and Society

72 pages ; 8.25x10.5 
ISBN  978-971-97-0839-1 (hardbound)
ISBN  978-971-97-0838-4 (softbound)